Kraftige børsfall i Europa og Asia

Europeiske børsar fall kraftig etter opninga torsdag. I Asia gjekk alle dei største børsane ned etter at ein toppsjef i Huawei vart arrestert i Canada.

Litt før klokka 11.30 hadde børsane både i London og Frankfurt gått ned 2,5 prosent. Hovudindeksen ved Oslo Børs låg 3 prosent lågare enn sluttnoteringa dagen før.

Samtidig låg prisen på nordsjøolje under 60 dollar fatet etter ein nedgang på nesten 4 prosent frå nivået onsdag.

I Tokyo fall Nikkei-indeksen 1,9 prosent i løpet av dagen. I Hongkong og Shanghai var nedgangen på høvesvis 2,5 og 1,7 prosent.

Ei av årsakene til det asiatiske børsfallet er arrestasjonen av finansdirektøren i mobilgiganten Huawei, Meng Wanzhou, i Canada. Onsdag vart det kjent at ho vart arrestert i Vancouver under ei mellomlanding i helga.

USA ønsker henne utlevert, og ifølgje Wall Street Journal er årsaka mistanke om at Huawei har opptredd i strid med USAs Iran-sanksjonar.

Styresmaktene i Kina krev lauslating av Meng umiddelbart. Arrestasjonen har ført til bekymring for at handelskonflikten mellom Kina og USA kan bli vanskelegare å løyse.

(©NPK)

Ein tavle som viser den internasjonale børsutviklinga i Tokyo i førre månad. Illustrasjonsfoto: Koji Sasahara / AP / NTB scanpix

ANNONSE
Annonse