KrF-topp: Homoterapi-forbod truar trusfridommen
KrFs parlamentariske leiar Hans Fredrik Grøvan åtvarar mot å gjere overgrep mot trusfridommen i konservative grupper i spørsmålet om såkalla «homoterapi».
- Dersom ein skal ha statleg godkjenning for kva for tema ein kan snakke om og be for, vil det vere eit kraftig inngrep i handlingsrommet til trussamfunna. Det opplever eg som eit kraftig overtramp, seier Hans Fredrik Grøvan til Dagen.
Grøvan tilhøyrer fleirtalet i KrFs stortingsgruppe som har sett foten ned for å greie ut eit forbod mot den omstridde terapien.
- Eit forbod mot konverteringsterapi vil føre til svært krevjande avgrensingar, og kan true sjølve trusfridommen i landet vårt, seier han.
Tysdag sende kultur- og likestillingsminister Trine Skei Grande (V) eit brev til Stortinget om at dei ønsker å greie ut eit forbod på vegner av dei tre andre regjeringspartia. I utgreiinga skal ein òg sjå nærare på trusfridom og diskrimineringsvern.
(©NPK)
- Eg set trusfridommen høgt, og respekterer frie val for menneske til å oppsøke den rettleiinga dei sjølv ønsker, også når det gjeld eigne tankar rundt seksuell orientering, seier KrFs parlamentariske leiar Hans Fredrik Grøvan. Foto: Terje Pedersen / NTB scanpix
