Kron tilkjend etappesigeren i Tour de Suisse – Leknessund imponerte

Andreas Kron var nummer to over målstreken på fredagsetappen i Tour de Suisse, men vart tilkjend sigeren fordi Rui Costa hindra han i spurten.

Portugisaren sjenerte dansken med linjevalet sitt på oppløpet, og Kron gestikulerte kraftig etter målpasseringa, medan Rui Costa lét vere å juble. 20 minutt seinare mista Rui Costa førsteplassen, og Kron vart utropt til etappevinnar.

– Det vil sikkert bli diskutert, men vi starta spurten på høgre side av vegen og enda opp heilt til venstre, sa Kron i sigersintervjuet. Den unge dansken er i sitt første år som profesjonell.

Andreas Leknessund trakka inn til tiandeplass, eitt minutt etter vinnaren på den tøffe etappen med fleire bratte stigningar. Den norske DSM-ryttaren sette farge på etappen og var lenge med i kampen om ei endå betre plassering.

Nest best av dei unge

Leknessund var mot slutten med i ei gruppe som tok opp jakta på David de la Cruz i teten. Nordmannen måtte resignere i den kampen, men han styrkte sjansen sin i kampen om ungdomstrøya.

Med to etappar igjen er Leknessund den nest beste ungdomsryttaren samanlagd, 11 sekund bak iren Eddie Dunbar frå Ineos-laget. Totalt er Leknessund på 15.-plass.

De la Cruz vart henta inn seks kilometer før mål, og tre mann gjorde til slutt opp om sigeren. Hermann Pernsteiner resignerte først og vart nummer tre.

Stoppa av magesjau

Amund Grøndahl Jansen var ein av fire Bikeexchange-ryttarar som ikkje var med frå start fredag etter å ha vorte ramma av magesjau. Også Lucas Hamilton, Luke Durbridge og Jack Bauer måtte kaste inn handkleet. Hamilton var nummer seks i samandraget.

Richard Carapaz i leiartrøya og dei andre som kjempar om samanlagtsigeren, kom inn 2.49 minutt bak vinnaren. Ineos-ryttaren frå Ecuador er 26 sekund føre danske Jakob Fuglsang og 38 føre tyske Maximilian Schachmann.

(©NPK)

Rui Costa (til v.) var først over mål på fredagsetappen i Tour de Suisse, men dansken Andreas Kron vart utropt til vinnar fordi han vart ulovleg hindra. Han gestikulerte kraftig etter målpasseringa, og 20 minutt seinare kåra juryen han til vinnar. Foto: Gian Ehrenzeller, Keystone via AP / NTB

Richard Carapaz i leiartrøya hamna eit stykke bak på fredagsetappen i Tour de Suisse, men forsvarte leiinga med to etappar igjen. Foto: Gian Ehrenzeller, Keystone via AP / NTB

Annonse
Annonse