Kvinne arrestert for giftbrev sendt til Det kvite hus

Politiet har arrestert ei kvinne mistenkt for å ha sendt eit brev med det dødelege stoffet ricin til Det kvite hus, opplyser føderale styresmakter.

Kvinna vart arrestert ved ein grenseovergang i delstaten New York då ho var på veg frå Canada til USA.

Konvolutten med det dødelege stoffet ricin vart freista send til Det kvite hus tidlegare førre veke, stadfesta Canadas føderale politi RCMP i helga.

Brevet vart sendt frå Canada, opplyser canadisk politi, og både FBI og Secret Service etterforskar saka.

All post til Det kvite hus blir sortert og blir undersøkt på ei anna adresse før den blir vidaresend til presidentbustaden, og det var ved dette anlegget konvolutten med det dødelege innhaldet vart oppdaga.

Kvinna skal òg ha sendt andre giftbrev til ulike fengsel, får kanalen NBC News opplyst. Det er ikkje kjent kven desse breva var adresserte til.

(©NPK)

Annonse
Annonse