Kvit jul i sikte frå sør til nord

Snøen blir liggjande over store delar av landet og sikrar stemninga julaftan. Men skal du heim til ei sørlandsk jul på fredag, må du køyre forsiktig.

Det er sendt ut farevarsel for Sørlandet på den store utfartsdagen fredag, opplyser vakthavande meteorolog Ragnhild Nordhagen. Årsaka er at det blir overgang frå regn til snø og dermed vanskelege køyreforhold.

- Onsdag og torsdag blir det nedbør som trekker inn i over Sør-Noreg, fortel ho.

Det er eit lågtrykk som ligg sør for Island som sakte, men sikkert flyttar seg austover. Nedbøren kjem først som regn på Sørlandet, men så blir det kaldare - og dermed snø.

Vanskeleg føre i Telemark og på fjellet

På Austlandet, Telemark og i fjellet fell snøen mange stader onsdag. Det kan skape trøbbel for dei som i hui og hast skal gjere unna den siste julehandelen eller reiser tidleg på juleferie. Det er sendt ut farevarsel på grunn av kombinasjonen av snø og vind i fjellet, og også i Telemark er det vanskelege køyreforhold.

- Det kan vere regn heilt ute ved kysten på Austlandet og fare for at regnet fryser på bakken, påpeikar statsmeteorologen.

Vêrmeldinga lovar likevel greie tilhøve for dei som skal krysse fjellet i helga, sjølv om det framleis kan komme lite snø heilt i dei sørlegaste fjellområda.

Snøen skaper kanskje problem når han fell, men for alle som drøymer om kvit jul, er vêrmeldinga lovande. Dei fleste stader som har snø utanfor vindauget no, vil framleis ha det når aller siste luke i kalenderen skal opnast måndag, skal vi tru Nordhagen.

På kartet til nettsida senorge.no over snøforholda, er store delar av landet lyseblått, men kysten er grøn og snøfri.

Våt julekveld i nord?

Folk i Trøndelag og nordover får ikkje noko særleg med nedbør mens dei gjer unna dei siste juleførebuingane. I Trøndelag vil temperaturane søkke til minusgrader fredag og i helga.

Men eit lågtrykk er i ferd med utvikle seg like nord for Svalbard. Det vil ta med seg nedbør frå Lofoten og inn til Vest-Finnmark natt til måndag, først i form av snø og sludd. På kvelden julaftan kan temperaturen stige og det kan bli overgang til regn i ytre strøk.

- Det ser ut til at det blir nedbør også i Nordland og Trøndelag utover mot kvelden, først som sludd og snø og så overgang til regn natt til første juledag, fortel Nordhagen.

- Dei stadene i nord som har snø, vil iallfall starte med ei kvit jul, trøystar ho.

Vestlandet ser ut til å sleppe unna mykje av nedbøren som lågtrykket tek med seg sørover og austover, med unntak av litt nedbør sør for Stad onsdag og torsdag. Det vil komme som snø frå 4-700 meters høgde. Eit anna lågtrykk «svirrar rundt» og kan også gi litt regn i ytre strøk og snø i fjellet i helga, fortel Nordhagen.

(©NPK)

På Jonsvannet i Trondheim prøvde fleire skøytene denne veka. Men husk å sjekke om isen er trygg før du skøytar utpå.
Foto: Gorm Kallestad / NTB scanpix

Annonse
Annonse