Lance Armstrong i NBC-intervju: - Eg gjorde det eg måtte for å vinne
Skandalesyklisten Lance Armstrong seier han ikkje angrar på den omfattande dopinga som gjorde at han vann - og seinare mista - sju Tour de France-titlar.
Det er i eit 30 minutt langt intervju med TV-kanalen NBC at Armstrong snakkar ope om kva han i dag tenker om dopingregimet som gjorde han til den store kongen i sykkelsporten på starten av 2000-talet.
Der fortel 47-åringen mellom anna at han måtte dope seg fordi det ikkje var mogleg å vinne noko som rein syklist.
- Vi gjorde det vi måtte for å vinne. Det var ikkje lovleg, men eg ville ikkje ha gjort noko annleis, heller ikkje å tape mykje pengar eller å gå frå å vere ein helt til å bli eit null, seier han i eit utdrag av intervjuet.
- Eg ville ikkje ha endra på noko. Eg ville ikkje ha endra måten eg gjekk fram på. Eller, det ville eg, men det er ei lengre historie. I hovudsak ville eg ha endra på lærepengane eg har fått. Eg hadde ikkje fått dei lærepengane viss eg ikkje hadde gjort det eg gjorde, seier Armstrong - som hevdar at han ønskte å bli avslørt.
- Om eg berre hadde dopa meg og ikkje hadde sagt noko, ville ikkje noko av dette ha skjedd. Ikkje noko. Eg bad om det, eg ønskte at dei skulle komme etter meg. Eg var eit lett bytte, seier verdsmeisteren frå Oslo-VM i 1993.
Heile intervjuet, som blir sendt som ein spesial under namnet «Lance Armstrong: Next Stage», blir vist på NBC natt til torsdag, norsk tid, kommande veke.
(©NPK)
Lance Armstrong hevdar at han ikkje angrar på at han dopet seg som sykkelproff. Bildet er frå eit foredrag i Oslo i 2009.
Foto: Stian Lysberg Solum / NTB scanpix
