Langrenn: Noreg går ikkje meir verdscup i 2020 – droppar truleg òg Tour de Ski

Det stadfestar skiforbundet i ei pressemelding. Bakgrunnen er uvissa rundt den rådande koronasituasjonen i Europa.

– Dette er ei vanskeleg avgjerd, men etter grundige diskusjonar internt meiner vi dette er riktig for langrenn slik situasjonen er no, seier leiaren av langrennskomiteen Torbjørn Skogstad.

Avgjerda kjem i kjølvatnet av at langrennsstjernene Johannes Høsflot Klæbo og Emil Iversen bestemde seg for å droppe dei kommande verdscuprenna.

– Hovudmålet vårt denne skisesongen er VM i Oberstdorf, seier langrennssjef Espen Bjervig.

Det er verdscuprenn i sveitsiske Davos 12. og 13. desember og i tyske Dresden helga etter. Konkurransane vil no gå utan nordmenn.

Det er ikkje teke eit endeleg val rundt Tour de Ski, men skiforbundet planlegg ikkje for norsk deltaking. Første etappe er 1. januar.

Krev Tour-endring

Ein føresetnad for at Noreg skal snu og stille til start i Tour de Ski, er at smittesituasjonen endrar seg og at gjennomføringa blir annleis enn arrangøren har lagt opp til. Per i dag er touren lagt til tre stadar i Sveits og Italia.

Renndirektøren for langrenn i Det internasjonale skiforbundet (FIS), Pierre Mignerey, seier at det blir jobba på spreng for å sikre at konkurransane blir trygge.

– Vi jobbar hardt med arrangørane og dei lokale forbunda og styresmaktene for å sikre at dei nødvendige tiltaka er på plass for å sikre trygge konkurransar, seier han til NTB.

Mignerey legg til at han respekterer Noregs avgjerd, men seier:

– Det er viktig at Noreg stiller i så mange verdscuprenn som mogleg.

Ein annan stor langrennsnasjon, Sverige, vurderer òg å hoppe av årets siste verdscupkonkurransar.

Meir krevjande enn anteke

Skiforbundets avgjerd om å halde langrennsløparane heime er òg teken etter ei vurdering av gjennomføringa av verdscupopninga i finske Ruka. Fleire norske løparar uttrykte bekymring etter å ha delteke der.

Klæbo uttalte måndag at uvissa rundt koronasituasjonen vart forsterka gjennom opphaldet i Ruka. Undervegs i Ruka-helga valde dessutan Heidi Weng å stå over etter eitt løp som følgje av bekymring over pandemien.

– I tillegg til risikoen ved å reise, har vi erfart at å halde avstand og unngå nærkontakt på verdscuparenaen er meir krevjande enn vi først antok. Uthaldsutøvarar har lungene som verktøy, og vi kjenner ikkje etterverknadene av covid-19. Derfor må vi ta forholdsreglar, seier Bjervig og held fram:

– Som resten av samfunnet opplever vi utryggje ved å tilpasse oss ein uviss kvardag. Vi har sjølvsagt forståing for at det kan vere ulike betraktningar rundt dette, men denne avgjerda er riktig for oss i Skiforbundet langrenn. Vi må ha fokus på å ta vare på helseperspektivet.

Koronadrama

I Finland vart det norske laget plassert i karantene i nærare eit døgn etter at herretrenar Eirik Myhr Nossum testa positivt for korona ved framkomst.

Seinare viste det seg at testen hans var såkalla falsk positiv, men karanteneepisoden gjorde ikkje Ruka-opplevinga betre for det norske laget.

Kommande helg skal dei beste langrennsløparane gå nasjonale renn på Lillehammer.

Hopplandslaget, som hadde ein heilt anna oppfatning av gjennomføringa i Ruka, køyrer vidare som planlagt og reiste måndag til Russland for å konkurrere i Nizjnij Tagil.

Heller ikkje landslaga i kombinert eller alpint har vurdert å stå over verdscuprenn. Kombinertleiren var òg nøgd med arrangementet i Ruka og førebur seg til konkurransar i austerrikske Ramsau frå 17. desember, der også kvinnehopparane skal delta.

Alpinistane køyrer sine neste konkurransar i Santa Catarina, Italia (menn) og St. Moritz, Sveits (kvinner) kommande helg.

(©NPK)

Det blir ikkje meir verdscup for Therese Johaug og dei andre norske langrennsløparane før nyttår. Foto: Emmi Korhonen / Lehtikuva / NTB