Leclerc raskast på trening – betring for Mercedes

VM-leiar Charles Leclerc var best i begge treningsomgangane før Spanias Grand Prix i Formel fredag 1, men Mercedes har omsider fått opp farten.

Leclerc hadde beste tid på formiddagstreninga framfor Ferrari-lagkameraten sin Carlos Sainz, men seinare på dagen var Mercedes-duoen George Russell og Lewis Hamilton nummer to og tre bak VM-leiaren.

Mercedes har slite med å gjere bilen konkurransedyktig og har vore langt bak dei beste i tidlegare rundar. I Barcelona har laget fått på plass ei etterlengta oppgradering som skal fikse nokre av problema, og så langt ser det ut til å fungere.

Russell var berre 0,117 sekund bak Leclerc i dagens siste treningsomgang, medan Hamilton var endå eit snautt tidel bak.

– Også i Miami var vi gode fredag, men då kom uroa tilbake, sa Mercedes-sjef Toto Wolff til Sky og ville ikkje ta noko på forskot.

Sainz var nummer fire fredag ettermiddag, verdsmeister Max Verstappen i Red Bull nummer fem.

Ferrari og Mercedes har begge oppgradert bilane til løpet i Barcelona, Red Bull ikkje.

(©NPK)

George Russell var nest raskast i treningsomgangen fredag ettermiddag og tente håpet om at Mercedes har løyst problema sine i tide til søndagens VM-løp i Barcelona. Foto: Joan Monfort, AP / NTB

ANNONSE
Annonse
ANNONSE
Annonse