Liverpool–Arsenal flytta på grunn av stengjetidene på puben
Kampen mellom Liverpool og Arsenal på Anfield kommande måndag er flytta fram eit kvarter. Årsaka: Pubane i Storbritannia stengjer klokka 22.00.
Kampen var opphavleg sett opp 20.15, lokal tid. Fordi publikum ikkje kan følgje kampen frå tribunen, men må ta til takke med å sjå kampen frå puben, har Premier League valt å flytte kampen eit kvarter. Ein kamp med start 20.15 er vanlegvis ferdig litt over 22.00, men med den nye tida rekk fotballsupporterane å sjå ferdig kampen før puben stengjer.
Kampen mellom Fulham og Aston Villa er òg flytta frå 18.00 lokal tid til 17.45. Dette for at TV-tidene ikkje skal gå over i kvarandre.
Det er ein times tidsforskjell frå England til Noreg.
(©NPK)
Virgil van Dijk & co. på Liverpool må starte eit kvarter tidlegare mot Arsenal kommande måndag for at pub-publikummet skal få med seg heile kampen. Foto: Paul Ellis / AP / NTB
