Livstidsdommar for kuppforsøket i Tyrkia

Dommane gjeld lovbrot som drap, kuppforsøk og forsøk på å likvidere president Recep Tayyip Erdogan. Ifølgje rettsdokumentet blir 337 personar dømde til fengsel på livstid.

Rettssaka har vore ei av dei største sidan det mislykka kuppet mot Erdogan i 2016.

Det er teke ut tiltalar mot i alt 475 personar, inkludert generalar og jagarpilotar ved flybasen Akinci i utkanten av hovudstaden Ankara som ifølgje tiltalane organiserte kuppforsøket og bomba fleire regjeringsbygg.

Dei tiltalte har vorte skulda for å tilhøyre nettverket til den religiøse leiaren Fethullah Gülen, som bur i eksil i USA, og som Tyrkia skuldar for å ha orkestrert kuppforsøket. Gülen nektar for å ha hatt noko med det å gjere.

I alt 251 personar mista livet og fleire enn 2.000 vart såra i det mislykka kuppet.

Medan kuppforsøket gjekk føre seg, vart nasjonalforsamlinga bomba tre gonger av F16-fly. Jagarpilotane bomba i tillegg vegen utanfor presidentpalasset og hovudkvartera til spesialstyrkane og politiet i Ankara.

Den dåverande forsvarssjefen, general Hulusi Akar, vart halden som gissel ved Akinci-basen saman med fleire andre militære leiarar. Akar er i dag forsvarsminister i Tyrkia.

(©NPK)

Politifolk og soldatar utanfor domstolen der 475 personar har stått tiltalt for medverknad i kuppforsøket i Tyrkia i 2016. Foto: AP / NTB