Nordre

Lobben til OB-trenaren snytte Solbakkens lag for siger

Ein lekker lobb frå OBS 40-årige hjelpetrenar Henrik Hansen snytte Ståle Solbakkens FC København for siger i treningskampen på fredag, som enda 2–2.

Hansen vart sendt innpå fordi alle reservane var nytta då Moses Opondo måtte ut, og fem minutt seinare vann han ein duell på 16-meterstreken og vippa ballen i ein høg boge over målvakt Karl-Johan Johnsson. Målet var høgdepunktet i kampen.

Sten Grytebust vakta FCK-målet i første omgang og heldt nullen. Laget leia 2–0 halvvegs etter mål av Mohamed Daramy og Pep Biel. Solbakken bytte alle 11 mann ved pause, og nemnde Opondo reduserte før Hansen utlikna i det 87. minuttet.

Sander Svendsen starta for OB, men vart bytt ut ved pause i Parken. Gjestene gjorde 13 byte totalt.

– Vi har trena saman i halvanna veke, og den fysiske forma er utmerka, men det var tydeleg at vi manglar kamptrening. Det er 10 dagar igjen til vi skal spele superliga, og vi må bruke dei godt på treningsfeltet, sa Solbakken til FCKs nettstad.

– Heldigvis har vi òg ein treningskamp tysdag (mot Sønderjyske).

For FCK held serien fram 1. juni med bortekamp mot Lyngby. OB gjestar AGF same dag.

(©NPK)

Ståle Solbakken så sitt FC København spele 2–2 mot OB i fredagens treningskamp som er eit ledd i oppkøyringa før sesongen i dansk superliga startar igjen. Foto: Berit Roald / NTB scanpix

ANNONSE
Annonse