Nordre

Lundby klinka til og vann Raw Air

Maren Lundby levde opp til favorittstempelet og knuste konkurrentane i Granåsen torsdag.

Det var den ellevte verdscupsigeren hennar denne sesongen, og dermed vann ho Raw Air samanlagt.

Lundby vann kvalifiseringa i Granåsen fredag og leidde med 26,8 poeng i Raw Air-samandraget på tyske Katharina Althaus før den avsluttande konkurransen torsdag.

I det første hoppet sitt i 138-meterbakken innfridde 24-åringen frå Gjøvik til dei grader og landa på 133 meter. I finalehoppet følgde ho opp med ein halvmeter til.

Historisk siger

Den ferske verdsmeisteren vann med det Raw Air samanlagt som den første kvinna i historia.

Tyskaren Juliane Seyfarth gjorde eit kjempehopp på 137,5 meter i finalen og tok 2.-plassen heile 13,1 poeng bak Lundby. Eva Pinkelnig frå Austerrike vart nummer tre.

Blant dei andre norske jentene leverte Anna Odine Strøm eit veldig godt førstehopp. 20-åringen noterte 121 meter. I hopp nummer to vart det halvmeteren kortare, og ho fall frå 8.- til 10.-plass.

Opseth og Bråten bomma

Silje Opseth fekk derimot ikkje full klaff. Ho strekte seg til 117,5 meter i det første hoppet. I finalehoppet la ho på éin meter og klatra med det frå 16.- til 12.-plass.

- Eg synest ikkje eg fekk det heilt til i dag. Eg vart passiv nedover ovanrennet, sa ho til NRK etter det siste hoppet sitt.

Ingebjørg Saglien Bråten fekk det heller ikkje heilt til å stemme og landa på 110,5 og 115 meter. Med det vart ho nummer 23.

Karoline Andrea Røstad opna ballet i trønderbakken, men 23-åringen landa etter 95,5 meter og fekk ikkje hoppe finaleomgangen.

(©NPK)

Maren Lundby vann Raw Air med endå ein verdscupsiger torsdag.
Foto: Ole Martin Wold / NTB scanpix

ANNONSE
Annonse
ANNONSE
Annonse