Magnus Carlsen spelte remis mot So – framleis eitt poeng bak teten
Magnus Carlsen leita forgjeves etter ein måte å slå Wesley So i partiet i Wijk aan Zee-turneringa fredag. Med remis er han framleis eitt poeng bak teten.
Etter 58 trekk og vel fem timar ved brettet enda det med eit halvpoeng til kvar.
– Det var relativt normalt, vil eg seie. Eg fekk ein liten fordel frå opninga, men det var vanskeleg å få veldig mykje ut av ho. Eg følte at eg var ganske nær på eit par tidspunkt til å oppnå i alle fall ein del strategisk, men han forsvarte seg godt. Eg prøvde og prøvde, men til slutt var eg ikkje i nærleiken, samanfatta Carlsen overfor TV 2.
Nodirbek Abdusattorov spelte remis mot Anish Giri og leier turneringa eit halvt poeng føre Giri. Endå eit halvpoeng bak følgjer Carlsen og So. Det står att to rundar, og Carlsen ser ikkje spesielt lyst på sjansane til å vinne turneringa for niande gong.
– Dei er ikkje veldig gode akkurat no. Eg trong ein siger i dag for å vere i rute, men eg kjem til å halde fram med å prøve dei to siste rundane. Så får vi sjå kor langt det held, sa han til TV 2.
Det vart remis i seks av sju parti fredag. Parham Maghsoodloo slo Rameshbabu Praggnanandhaa, men ingen av dei er i tetsjiktet.
Carlsen møter Praggnanandhaa med kvite brikker laurdag og Arjun Erigaisi med svarte brikker i siste runde søndag.
Den norske verdsmeisteren er tittelforsvarar i turneringa i Nederland, som han har vunne fleire gonger enn nokon annan.
(©NPK)
Magnus Carlsen spelte remis mot Wesley So fredag og er framleis eitt poeng bak teten i turneringa i Nederland. Foto: Carina Johansen / NTB / NPK
