Måling: Klimaendringar er den største tryggingstrusselen på kloden

Klimaendringar toppar lista over dei største tryggingstruslane, men bekymring for USA under Trump aukar, ifølgje ei global meiningsmåling.

I 13 av 26 land i undersøkinga overgår klimafrykta alle andre tryggingstruslar, viser undersøkinga, som er utført av den uavhengige amerikanske tankesmia Pew Research Center. Totalt 27.612 personar deltok i undersøkinga mellom mai og august i fjor.

I åtte land, blant dei Frankrike, blir trusselen frå militante islamistiske grupper rangert øvst, mens frykt for dataangrep tronar øvst i fire av landa.

Bekymringa for IS er likevel avtakande. Spesielt i USA, Japan, Spania og Israel er IS-frykta markant lågare enn i 2017. Gruppa har dei siste åra vorte påførte enorme tap i Syria og Irak.

Rundspørjinga viser ein markant auke i bekymringa knytt til USAs rolle i verda. I 2013, då Barack Obama var president, såg 25 prosent på USAs makt som ein trussel. Under Trump har delen stige til 45 prosent. I ti land, inkludert Tyskland, Japan og Sør-Korea, svarar halvparten at USAs makt utgjer ein vesentleg trussel mot landet deira.

Undersøkinga viser også at regionale konfliktar og spenningar påverkar trusselvurderingane til folk. I Polen blir Russlands makt og innverknad rangert som den største tryggingstrusselen, mens sørkoreanarar vurderer Kinas makt som den største trusselen frå eit enkeltland.

(©NPK)

Smeltande is frå isbrear som kalvar ut i Kongsfjorden ved Ny-Ålesund på Svalbard. Klimaendringar er tryggingstrusselen som bekymrar folk mest, ifølgje Pew Research Center. Foto: Are Føli / NTB scanpix

ANNONSE
Annonse