Mange alvorleg skadd av sjølvmordsbombe på hotellet i Nairobi
Mange gjester på luksushotellet som er under angrep i Nairobi, vart alvorleg skadde av ein sjølvmordsbombar i lobbyen til hotellet. Seks av sju etasjar i bygninga er no sikra.
Det opplyser den nasjonale politisjefen i Kenya, Joseph Boinett.
- Angrepet var ein koordinert operasjon som inkluderte ei sjølvmordsbombe i lobbyen i hotellet, sa Boinett i ei TV-send fråsegn.
- Vi kan no bekrefte at dei kriminelle handlingane skjedde rundt klokka 15 (lokal tid, red.anm.) på ein koordinert måte. Det starta i I&M Bank med ein eksplosjon retta mot tre bilar på parkeringsplassen og ein eksplosjon i lobbyen til Dusit hotell, sa han.
Han seier mange gjester skal ha vorte alvorleg skadde i eksplosjonen, men kom ikkje med opplysningar om eventuelle drepne.
Ifølgje AFPs fotograf er minst fem drepne i angrepet. Ubekrefta meldingar antydar mykje høgare dødstal.
Dusit-komplekset i bydelen Westlands nord i Nairobi husar forutan luksushotellet DusitD2 fleire kontor og bankar. Spesialstyrkar har jakta på angriparane, som har vore inne i hotellet.
Seks av sju etasjar i bygninga er no sikra, opplyste Boinett.
Den ytterleggåande islamistgruppa al-Shabaab har tatt på seg ansvaret for angrepet.
(©NPK)
