MDG ser mot Hakkebakkeskogen
Det endelege målet for politikken må vere at folk trivst, seier MDGs Rasmus Hansson. Han meiner ideala frå Hakkebakkeskogen er verdt å strekkje seg etter.
- Vi vil forme samferdselspolitikk, arbeidslivspolitikk, skulepolitikk og helsepolitikk som har folks trivsel som overordna mål, sa Hansson i landsmøtetalen sin på Fornebu fredag.
Som døme trekte han fram det naturlege framfor det syntetiske, samfunnsansvar framfor profitt, langsteikt mat framfor hurtigmat, gåvenlege bysenter framfor fjerne kjøpesenter, ferie framfor auka kjøpekraft og reparasjon framfor bruk og kast.
- Jada, det høyrast ut som Miljøpartiet Dei Grøne vil gjere Hakkebakkeskogen til universell samfunnsmodell, sa Hansson og heldt fram:
- Det er ganske enkelt sånn at folk som trivst, er meir produktive, belastar helse- og sosialbudsjetta mindre og er greiare å ha med å gjere. Hakkebakkeskogen løner seg!
(©NPK)
