Nordre

MDG vil erklære klimakrise i Oslo

Bystyret i Oslo må slutte seg til eit innbyggarforslag om å erklære miljø- og klimakrise, tilrår Oslo-byråd Lan Marie Berg i eit brev onsdag.

MDG-toppen viser i brevet til eit sterkt behov for tiltak og politikk for å motverke tap av naturmangfald og få ned klimautsleppa.

«Jeg anbefaler derfor bystyret å erklære miljø- og klimakrise og at bystyret samtidig oppfordrer nasjonale myndigheter til å gjøre det samme», skriv Berg.

Det raudgrøne byrådet brukte ordet «klimakrise» allereie i samarbeidsplattforma som vart forhandla fram i 2015.

Sidan den gongen har blant andre det britiske parlamentet, Irland, Canada og Sveits gjort eksplisitte vedtak om at verda er i ein klimatisk nødsituasjon. Det same har storbyar som Sydney og Melbourne og fleire norske kommunar og fem fylke gjort.

- Oslo skal slå fast at vi ikkje har ein bompengekrise, men ein klima- og naturkrise. Dette er vår tids største utfordring, og vi må samle oss om å løyse dette som fellesskap før det er for seint, seier Berg til NTB.

Det raudgrøne byrådet varslar i den ferske klimastrategien sin at Oslo skal bli den første storbyen i verda med null utslepp innan 2030.

(©NPK)

Oslos miljø- og samferdselsbyråd Lan Marie Berg (MDG) vil at Oslo skal vedta klimakrise. Foto: Berg-Rusten, Ole / NTB scanpix

ANNONSE
Annonse
ANNONSE
Annonse