Meir motgang for sykkel-VM i Bergen
Konkursbuet til sykkel-VM i Bergen tapte rettssaka mot Hordaland fylkeskommune og får ikkje pengane dei meiner å ha krav på.
Fylkeskommunen i Hordland slepp å betale 5,2 millionar kroner til VM-kreditorane, melder Bergens Tidende etter rettsavgjerda i Asker og Bærum tingrett.
- Vi tar dommen til etterretning og er fornøgd med utfallet, seier rådmann i Vestland fylke, Rune Haugsdal.
Hordaland fylkeskommune hadde vedtatt å stille med 5,2 millionar kroner i ei såkalla usikkerheitsavsetning i samband med sykkel-VM i 2017.
Etter at Bergen 2017 AS gjekk konkurs nekta fylket å betale det som også vart omtalt som ein underskotsgaranti.
I september møtte fylket og konkursbuet i Asker og Bærum tingrett. Buet hadde saksøkt fylket for å få ut pengane dei meinte dei hadde krav på.
Konkursbuet i Bergen 2017 AS har over 100 millionar kroner i innmelde krav mot seg.
- Det er viktig at andre arrangørar som skal halde store arrangement som dette, les dommen, og sørger for å sikre seg slik at noko slikt ikkje skjer igjen, seier bustyrar advokat Ågne Laastad.
(©NPK)
Sykkel-VM i Bergen i 2017 vart ein sportsleg suksess, medan økonomisk gjekk det verre med eit konkurskrav på over 100 millionar kroner. Foto: Cornelius Poppe / NTB scanpix
