Milan-spiss kunne ikkje spele – gir bort millionlønn til gode formål

Mario Mandzukic (34) donerer bort heile marslønna til gode formål. Ein skade gjorde at angriparen ikkje fekk ein einaste kamp for Milan førre månad.

Kroaten kom til Milano-klubben på fri overgang i januar. Han skreiv då under ein korttidsavtale ut sesongen.

Mandzukic rakk berre å spele fire Milan-kampar før han pådrog seg ein muskelskade. Han har mista sju av tolv moglege Serie A-oppgjer.

Sidan veteranen i mars ikkje kunne hjelpe klubben i jakta på Champions League-spel, vel han å gi bort heile den siste månadslønna. Ifølgje italienske medium tener Mandzukic 300.000 euro i månaden. Det vil seie litt over 3 millionar kroner.

– Denne utrulege gesten viser kor proff Mario Mandzukic er, seier Milan-president Paolo Scaroni.

Pengane skal gå til formål for barn og unge.

(©NPK)

Mario Mandzukic jublar etter Kroatias semifinalesiger over England i fotball-VM i 2018. Foto: Svein Ove Ekornesvåg / NTB

Annonse
Annonse