Milepæl for Microsoft - marknadsverdien har passert 1.000 milliardar
Microsoft passerte torsdag for første gong 1.000 milliardar dollar i marknadsverdi. Programvareprodusenten er i dag det meste verdifulle selskapet i verda.
Aksjekursen steig torsdag morgon med 5 prosent og var oppe i 130,59 dollar. Oppgangen kom dagen etter at selskapet la fram eit overraskande godt kvartalsrekneskap. Dermed passerte marknadsverdien 1.000 milliardar dollar (cirka 9.000 milliardar kroner) før aksjekursen gjekk noko nedover igjen.
Det er skytenesta Azure og abonnementsvarianten av den velkjende Office-pakken til selskapet som har bidratt til det gode resultatet.
Microsoft har dei tre siste månadene levert eit overskot på 8,8 milliardar dollar, 19 prosent høgare enn same periode i fjor. Samtidig har omsettinga auka med 14 prosent til 30,6 milliardar dollar.
Tidlegare har to andre teknologigigantar, Apple og Amazon, passert 1.000 milliardar dollar i verdi. Det skjedde i fjor før verdien igjen fall til under 1.000 milliardar.
(©NPK)
Microsoft er i dag det mest verdifulle selskapet i verda etter ein kraftig auke i inntekter og omsetning dei tre siste månadene. Arkivfoto: Ted S. Warren / AP / NTB scanpix
