Minst 26 personar omkom under uvêr i Pakistan

Minst 26 personar mista livet i uvêr som ramma store delar av Pakistan torsdag.

Styrtregn utløyste kortvarig, intens flaum i fleire byar over heile landet. Fleire vart feia bort av flaumane, eller omkom i det taka deira kollapsa torsdag morgon, opplyser pakistanske styresmakter.

14 personar, inkludert barn, mista livet i Khyber Pakhtunkhwa-provinsen, som grensar til Afghanistan.

Vidare omkom minst ni personar i den sentrale delen av Pakistan. Fire av dei omkom i byen Multan, ifølgje politi og redningstenesta. I tre av tilfella kom dødsfalla av tak som kollapsa under styrtregnet.

Fleire landsbyar stod under vatn som følgje av flaum nær den sørvestlege byen Lasbella i Balutsjistan-provinsen. Tre personar omkom og rundt 200 familiar vart ramma.

- Beredskapsarbeidarar har prøvd å redde folk frå den overfløymde delen av byen, opplyste talsmann Imran Zarqoon for katastrofeberedskapstenesta i provinsen.

Kvart år kjempar mange byar og tettstader i Pakistan med å takle den årlege regntida. Det har vorte reist kritikk mot fleire stader som planlegg perioden dårleg.

(©NPK)

Annonse
Annonse