Mistanke om at mann er smitta av nytt virus i Australia
Ein mann i Australia kan vere smitta av eit nytt og mystisk coronavirus med opphav i Kina. Han er plassert i isolasjon heime hos seg sjølv i Brisbane.
Det opplyser australske helsestyresmakter tysdag.
Dei ventar no på resultata av testane som er tatt av mannen, og det kan ta fleire dagar før dei er klare.
Australia har òg innført helsetestar for alle som kjem med fly frå den kinesiske millionbyen Wuhan, der viruset har opphavet sitt.
Viruset kan føre til alvorleg lungesjukdom, og i Kina er fire menneske døde som følgje av sjukdom. Over 200 personar er så langt smitta i Kina, og det er òg påvist enkelttilfelle i Japan, Thailand og Sør-Korea.
(©NPK)
