Mistillitsforslag mot statsministeren i Tsjekkia

Det blir kravd alminneleg fleirtal – over 50 prosent – når nasjonalforsamlinga behandlar forslaget torsdag. Dei fem konservative og liberale partia som står bak forslaget, har 68 av dei 200 seta og må derfor ha støtte frå fleire.

Kommunistpartiet har førebels ikkje flagga korleis dei vil stemme. Med 19 plassar, blir standpunktet til partiet rekna som avgjerande for saka.

President Milos Zeman har allereie varsla at regjeringa blir sitjande fram til valet i oktober, uansett utfallet i mistillitsspørsmålet.

Ivan Bartos i Piratpartiet meiner Babis er i ein interessekonflikt som statsminister og grunnleggjar av eit forretningskonglomerat. Denne veka bad politiet om at statsadvokaten reiser tiltale mot Babis for å lurt til seg EU-middel til eitt av firmaa sine.

– Vi kan ikkje ha ein statsminister med så alvorlege skuldingar mot seg, seier opposisjonspolitikar Bartos.

(©NPK)

Opposisjonen i Tsjekkia varslar mistillitsforslag mot statsminister Andrej Babis. Frå før risikerer han tiltale for triksing med EU-middel. Arkivfoto: Johanna Geron / AP / NTB