Mowinckel tok VM-bronse i superkombinasjon

Ragnhild Mowinckel kom seg fint gjennom slalåmrennet og kunne juble for bronse i superkombinasjonen fredag. Det er Noregs første medalje under Åre-VM i alpint.

Slalåm er ikkje ein spesialitet for Molde-jenta, men ho leverte eit toppløp i den svenske bakken. Mowinckel enda 45 hundredels sekund bak Wendy Holdener frå Sveits og forsvarte med det tredjeplassen frå utforen.

Kajsa Vickhoff Lie imponerte i VM-debuten. I utfordelen sleit ho i snøvêret og var 1,16 sekund bak teten, men i slalåmbakken leverte ho ein sterk omgang og klatra frå 15.- til 7.-plass.

Tidlegare på dagen køyrde Mowinckel ein strålande utfordel. I tett snødrev gjorde ho ingen store feil ned den svenske fartstraseen. Særleg på toppen og i den nedre delen trefte ho godt. Frå startnummer sju tok det norske håpet ei klar leiing og enda til slutt som nummer tre i utforrennet.

Den raskaste av alle var den austerrikske fartsspesialisten Ramona Siebenhofer, men ho hadde ikkje meir enn seks hundredelar å gå på til Mowinckel i slalåmen.

Mowinckel var klar på at ho leverte den beste utforomgangen for sesongen.

- Ja, herregud, det var det. Det var herleg å få det til i dag. Det er herleg å vite at eg klarte å samle meg då det gjaldt. Det var viktig, i og med at eg var litt i villreie etter treninga i går, sa ho til NRK.

Dette sa ho om medaljesjansane før slalåmdelen:

- Det er ein flat slalåm, og då er eg glad. Eg kjem til å «gutse», og no har eg moglegheita til å ta ein medalje. Det er alt eller ingenting.

(©NPK)

Ragnhild Mowinckel tok VM-bronsen i kombinasjonen i Åre. Foto: Cornelius Poppe / NTB scanpix

ANNONSE
Annonse