Mykje regn kan gi lågare straumpris
Dersom vêrmeldinga om mykje regn slår til, vil straumkundane merke det på prisen, fortel leiaren for marknadsavdelinga i Skagerak Kraft.
– Dette er bra, for no er vi sugne på å få litt vatn i magasina, seier Andreas Billington til NRK.
Han er usikker på kor mykje det vil slå ut på prisen.
– Det tør eg ikkje seie heilt sikkert, men det vil jo dempe prisen noko og på ein måte gjere oss meir sikre inn mot vinteren når vi får fylt på litt i magasina. Det vil vere eit veldig pluss for forbrukaren, seier leiaren for marknadsavdelinga i kraftselskapet.
Tysdag kostar ein kilowattime i Sør-Noreg 1,10 kroner kilowattimen utanom påslag, nettleige og avgifter, ifølgje oversikta til Nord Pool. På det høgaste denne månaden har han vore 1,23 kroner.
(©NPK)
Det er meldt meir regn dei nærmaste dagane. Foto: Carina Johansen / NTB
