Nadal med ny nedtur – snubla på heimebane
Rafael Nadal tapte for Alexander Zverev i to strake sett i Madrid Open fredag. For andre gong på kort tid rauk tennisstjerna ut i ein ATP Masters-kvartfinale.
Zverev vann med settsiffera 6–4, 6–4. Dermed blir ikkje Nadal ein potensiell finalemotstandar for Casper Ruud, som seinare fredag skal bryne seg på kasakhstanaren Alexander Bublik. Den spanske gruskongen er den store læremeisteren til Snarøya-guten.
Det såg lovande ut for Nadal i det første settet. 34-åringen braut den tyske motstandaren sin til 4–2, men Zverev slo knallhardt tilbake med to vellykka brotballar.
Veteranen vart broten igjen i sett nummer to. Det sende Zverev opp i 3–2, og han serva deretter heim sigeren og semifinalebilletten.
Grusturneringa i Spania er på ATP Masters 1000-nivå. Det er berre Grand Slam-konkurransane som har høgare status i tennissporten. Nadal-exiten kom tre veker etter at favoritten kom til kort i kvartfinalen i Monte-Carlo Masters.
Nadal har vunne Madrid Open flest gonger med dei fem triumfane sine. Den siste kom i 2017. Fjorårsutgåva vart avlyst på grunn av koronapandemien.
På verdsrankinga er spanjolen nummer to, medan Zverev ligg på sjetteplass.
(©NPK)
Rafael Nadal fekk det tungt mot Alexander Zverev i kvartfinalen i Madrid Open fredag. Foto: Bernat Armangue / AP / NTB
