Newcastle har vikarmanager i to kampar

Graeme Jones får ansvaret for å leie nyrike Newcastle i dei to neste Premier League-rundane. Klubben treng tid på å finne Steve Bruces erstattar.

Det stadfesta Jones på ein pressekonferanse fredag. Etter planen styrer han Newcastle borte mot Crystal Palace laurdag og heime mot Chelsea ei veke seinare.

Jones vart i januar ein del av støtteapparatet etter å ha jobba under Roberto Martínez på det belgiske landslaget.

Onsdag kom nyheita om at Bruce var ferdig som Newcastle-manager. Avgangen skjedde få veker etter at klubben vart kjøpt opp av eit saudiarabisk investeringsfond.

Dei nye eigarane ønskjer å gjere Newcastle til ein maktfaktor, men i første omgang må laget spele seg ut av nedrykkstrøbbel. Null sigrar og skrale tre poeng er fasiten etter åtte Premier League-rundar.

Tidlegare Roma-trenar Paulo Fonseca er nemnd som den fremste kandidaten til å ta over etter Bruce, men Eddie Howe og Lucien Favre skal òg vere på blokka. Duoen har fortid i høvesvis Bournemouth og Borussia Dortmund.

(©NPK)

Newcastle-spelarane i ein ligakamp mot Wolverhampton nyleg. Foto: Rui Vieira / AP / NTB

Annonse
Annonse