Newcastle sette ny overgangsrekord
Newcastle grev djupt i lommene for å signere brasilianske Joelinton frå Hoffenheim. Spissen er den dyraste signeringa til Premier League-klubben nokosinne.
Det skriv Newcastle på heimesidene sine tysdag kveld. Dei vil ikkje ut med overgangssummen, men skriv at overgangssummen er ny klubbrekord.
Både Sky Sports og BBC melder om at Joelinton kostar 40 millionar pund. Det svarer nesten til 430 millionar kroner og er dobbelt så mykje som Newcastles tidlegare rekord. Den sette dei då dei henta paraguayanaren Miguel Almirón frå Atlanta United i januar.
Joelinton er 22 år gammal. Han starta karrieren i Sport Recife i heimlandet. I 2015 vart han seld til tyske Hoffenheim. Han har òg vore på utlån i Rapid Wien i Austerrike.
Newcastle er leia av Steve Bruce. Den tidlegare Manchester United-helten tok over klubben etter at Rafael Benitez gav seg etter 2018/19-sesongen.
(©NPK)
