NFF skal undersøkje Berntsen-sparkinga i Viking
Vikings omstridde brot med trenarveteranen Bjarne Berntsen hamnar på bordet til Norges Fotballforbund.
Det opplyser leiar Espen Auberg i NFFs juridiske seksjon til VG. Årsaka er at det var Vikings AS-styre, og ikkje Viking Fotballklubb, som gjennomførte forhandlingane med Berntsen.
– Vi tek ein første runde på det no gjennom veka. Då vil vi be Viking om ei forklaring. Før det vil vi ikkje kunne seie så mykje meir, seier Auberg.
Førre veke vart det kjent at Berntsen ikkje får halde fram som hovudtrenar i Viking etter sesongen. Han hadde eitt år igjen av kontrakten.
Det var AS-styret til klubben som var i samtalar med 63-åringen om vegen vidare. Det enda med at partane braut med kvarandre og i staden forhandla om sluttavtale.
Det kan vere brot på idrettens eigne reglar. Det er fotballklubben, og ikkje aksjeselskapet, som er arbeidsgivar for Vikings spelarar og trenarar.
Tysdag erkjende styreleiar for Viking FK, Rune Bertelsen, at det vart gjort ein «stor feil» og at han skulle ha teke seg av forhandlingane.
– Vi må ta konsekvensane av dei feila vi har gjort i både AS og FK. Vikings beste må komme først, seier Bertelsen til Stavanger Aftenblad.
EMBED START Image Det har storma i Viking etter at klubben avgjorde å bryte med trenar Bjarne Berntsen etter sesongen. Foto: Carina Johansen / NTB EMBED END Image(©NPK)
