NFL-superstjerne fekk kneskåla slått ut av ledd

Patrick Mahomes, quarterback for Kansas City Chiefs og ein av dei største stjernene i NFL, fekk kneskåla slått ut av ledd i kampen på måndag mot Denver Broncos.

24-åringen har på kort tid etablert seg som ein av dei beste og mest spektakulære quarterbackane i NFL og vart førre sesong kåra til den mest verdifulle spelaren i ligaen. Han vart skadd då han sjølv kasta seg fram med ballen i ein situasjon der laget mangla berre nokon centimeter på å få fire nye forsøk.

Chiefs fryktar at skaden førte med seg alvorlege bandskadar i kneet, men det fulle omfanget blir klart først etter ei MR-undersøking. Då blir det avgjort om han må opererast.

Inn for Mahomes kom den 35-årige reserven Matt Moore, som ved hjelp av ein strålande forsvarsinnsats førte laget til 30-6-siger.

Mahomes var hovudgrunnen til at Chiefs vart rekna som ein av dei heitaste favorittane til å nå Superbowl denne sesongen.

(©NPK)

NFL-superstjerna Patrick Mahomes frå Kansas City Chiefs får behandling på banen etter at kneskåla hans vart slått ut av ledd i NFL-kampen mot Denver Broncos måndag. Foto: David Zalubowski, AP / NTB scanpix

Annonse
Annonse