Ni av ti bestod statsborgarprøva
I fjor tok 7.216 personar statsborgarprøva. 91 prosent bestod. Prøva er eitt av fleire steg på vegen mot statsborgarskap i Noreg.
– Det er gledeleg at så mange gjennomfører og består prøva. Eg veit at dette er eit viktig steg for mange på vegen til norsk statsborgarskap, seier arbeids- og inkluderingsminister Marte Mjøs Persen (Ap) i ei pressemelding.
Prøva består av 32 poenggivande spørsmål, og dei som tek prøva, må svare rett på minst 24 av dei for å få bestått.
Direktoratet for høgare utdanning og kompetanse har utvikla prøva på oppdrag frå Arbeids- og inkluderingsdepartementet.
Statsborgarprøva er ei kunnskapsprøve med utgangspunkt i læreplan for opplæring i samfunnskunnskap for vaksne innvandrarar.
Til saman vart nesten 40.000 utlendingar norske statsborgarar i fjor.
(©NPK)
