NIPT-testing for alle framleis ikkje på plass
Nærare eitt år har gått sidan den genetiske svangerskapsprøva NIPT vart tillaten i Noreg. Men alle norske kvinner kan framleis ikkje få ho.
Norske kvinner må framleis til utlandet, eller sende blodprøver til klinikkar i utlandet for å få gjennomført testen, skriv NRK.
Inntil den nye ordninga er på plass, vil tilbod om fosterdiagnostikk i Noreg berre gjelde dei som oppfyller visse kriterium.
Testen kan avdekkje om fosteret har Patau syndrom, Edwards syndrom eller Downs syndrom. Svangerskapsprøva vart tillaten i fjor, men ingen private aktørar har fått dei nødvendige godkjenningane som trengst for å gjennomføre testen i Noreg.
Både Ap, SV og Frp uttrykkjer overfor rikskringkastaren at dei meiner regjeringa har brukt for lang tid på å få på plass ordninga.
Sistnemnde parti var i si tid med på å forhandle fram det å få på plass NIPT-testing i Noreg før dei trekte seg frå regjeringa.
– Regjeringa har brukt nesten eitt år på å få på plass ei godkjenningsordning for privat aktørar som vil tilby NIPT. Eg meiner det er ei medviten trenering frå regjeringspartia, seier Frps helsepolitiske talsperson Åshild Bruun-Gundersen.
Helseminister Bent Høie (H) kallar kritikken urimeleg, og seier det som er tidkrevjande er at Stortinget har vedteke klare krav til kvalitet og kompetanse dei private aktørane skal ha.
– Dette er ei av oppgåvene som direktoratet har klart å prioritere rask framdrift på. Sjølv om dei har handtert ei nasjonal krise. Derfor synest eg det er ganske urimeleg av opposisjonen å kritisere framdrifta på denne saka, seier han til NRK.
(©NPK)
Helseminister Bent Høie meiner det er urimeleg av opposisjonspartia å kritisere regjeringa for å vere for treg med å få på plass NIPT. Foto: Gorm Kallestad / NTB / NPK
