No kan Ukraina-ramma bedrifter søkje om støtte
Regjeringas krisepakke for bedrifter som har fått problem som følgje av krigen i Ukraina og sanksjonane mot Russland og Belarus, er klar.
– Dette er eit viktig bidrag for å sikre mange lokalsamfunn og bedrifter i Aust-Finnmark som har vore hardt ramma av sanksjonane, seier kommunal- og distriktsminister Sigbjørn Gjelsvik (Sp) i ei pressemelding torsdag morgon.
Vedteke i vår
Krisepakken er vedteken av Stortinget og godkjent av Eftas overvakingsorgan (Esa). Støttetiltaka vart vedtekne i april og inngjekk då i ein større tiltakspakke på til saman 14,4 milliardar kroner, og det aller meste skulle gå til mottak av flyktningar, Forsvaret og militær beredskap.
– Eg er derfor glad for at vi no har fått på plass fleire støtteordningar som vil gi næringslivet nødvendige midlar på kort sikt, og bidra til omstilling på lengre sikt, seier næringsminister Jan Christian Vestre (Ap).
Dette er pakken:
- Støtteordning på 55 millionar kroner for bedrifter med omsetningsfall.
- 50 millionar kroner til i regionale utviklingsmidlar til Troms og Finnmark fylkeskommune.
- Lånegarantiordning for bedrifter som står overfor likviditetsmangel.
- Lågrisikolån gjennom Innovasjon Noreg.
(©NPK)
