Nord-Korea hevdar å ha utvikla og testa nytt våpen

KCNA spesifiserer ikkje i meldinga kva slags våpen det er snakk om, skriv det sørkoreanske nyheitsbyrået Yonhap.

Leiaren i landet, Kim Jong-un, skal ifølgje meldinga ha inspisert våpenet og var tilskodar då våpenet vart testa fredag. Testen «var vellykka», ifølgje KCNA.

- Det toppmoderne våpenet, som lenge har vore under utvikling under det dynamiske leiarskapet til partiet vårt, har som føremål å verne territoriet vårt og betydeleg forbetre kampstyrken i hæren, heiter det i meldinga, skriv Yonhap.

«Trygge»

Det amerikanske forsvarsdepartementet seier i ei utsegn at dei framleis er «trygge» på det som vart vedteke på toppmøtet med Donald Trump og Kim Jong-un i Singapore i juni, der dei kom fram til ei vag semje om atomvåpennedrusting.

Departementet seier avtalen «vil skape ei lysare framtid» i Nord-Korea.

- Vi er i samtale med Nord-Korea om å gjennomføre avtalen. Vi er sikre på at løfta frå Trump og Kim vil bli oppfylt, heiter det i utsegna.

- Nye missil

Våpeninspeksjonen til statsleiaren er den første kjende sidan han var til stades ved testen av eit Hwasong-15-missil i november i fjor, ifølgje Yonhap.

I juli sa amerikanske etterretningskjelder til Washington Post at dei trur Nord-Korea er i ferd med å utvikle nye missil.

Det er ikkje kjent kvar missiltesten på fredag vart gjennomført, anna enn at det skal ha vorte gjort ved «eit nasjonalt forsvarsinstitutt».

(©NPK)

Nord-Koreas leiar Kim Jong-un saman med Cubas president Miguel Díaz-Canel i starten av november. Foto: AP / NTB scanpix