Nordmann arrestert i Spania mistenkt for terrortilknyting

Ein nordmann i 40-åra er arrestert i Spania for tilknyting til terrorisme, stadfestar Utanriksdepartementet til Dagbladet.

– Utanrikstenesta er kjend med saka og vil tilby konsulær bistand til den fengsla i samsvar med fast praksis og gjeldande rammer for konsulær bistand. På grunn av lovpålagd teieplikt har vi ingen ytterlegare kommentarar til saka, skriv ein pressetalsperson ved Utanriksdepartementet til Dagbladet.

Det var Spaniaavisen som først omtalte arrestasjonen blant norske aviser.

Den norske statsborgaren vart arrestert i Alicante av den spanske polititenesta Guardia Civil. Europol har også vore involvert i etterforskinga.

Ifølgje Guardia Civil skal det mellom anna ha vorte funne store mengder propagandamateriell frå terrororganisasjonen IS som mannen skal ha spreidd på nettet. Det skal også ha vorte funne dokument om korleis ein skal kunne rekruttere og indoktrinere fleire potensielle IS-tilhengjarar.

Mannen skal også ha prøvd å komme seg inn i Syria og Irak saman med tre andre som tidlegare skal ha delteke i valdshandlingar. Blant desse er ein mann som politiet mistenkjer å stå bak eit terrorangrep i Groznyj i Tsjetsjenia der 21 menneske vart drepne og 16 vart såra.

Mannen i 40-åra vart varetektsfengsla tysdag.

ANNONSE
Annonse
ANNONSE
Annonse