Noreg aukar støtta til FNs miljøprogram

Norske styresmakter aukar bidraget til FNs miljøprogram til 360 millionar kroner - ein auke på 90 millionar frå førre avtaleperiode.

Den nye avtalen blir underteikna i New York torsdag når utviklingsminister Dag-Inge Ulstein (KrF) møte danske Inger Andersen, som er leiar for FNs miljøprogram (UNEP).

- UNEP er ein viktig partnar for regjeringas auka satsing på miljø i utviklingspolitikken. Vi øyremerker no midlar til mellom anna UNEPs arbeid med å førebygge klimaendringar og marin forsøpling. God førebygging vil redusere omfanget av kriser, seier Ulstein i ei pressemelding.

Brorparten av pengestøtta er ikkje øyremerkt og vil gå rett til det generelle arbeidet til miljøprogrammet. Noreg har øyremerkt 43 millionar til mellom anna kampen mot forureining i havet.

UNEP koordinerer FNs miljøaktivitetar, støttar utviklingsland i å innføre miljøvennleg politikk og oppmodar til berekraftig utvikling gjennom sunne miljøvennlege tiltak. Klima- og miljøminister Ola Elvestuen (V) er president for UNEPs neste miljøforsamling i 2021, og det auka norske bidraget støttar opp om Elvestuens rolle.

(©NPK)

Annonse
Annonse