Noreg takka nei til tysk ishockeyturnering

Noregs ishockeyforbund vil ikkje delta i ei landslagsturnering i Tyskland i november. Smittesituasjonen i Europa set ein stoppar for det.

Noreg var invitert til den årlege turneringa i Krefeld saman med Tyskland og Latvia frå 5.–8. november. Russland og Sveits trekte seg frå turneringa, og derfor fekk Noreg innbyding.

– Vi har jobba hardt med å finne løysingar rundt reisebiten til spelarane, men klarte ikkje å få alt på plass med tanke på heimreisa for spelarane frå dei ulike ligaene i Europa. Det var for mykje uvisse rundt dette, seier sportssjef Petter Salsten til NTB.

Landslagssjef Petter Thoresen kunne ha nytta seg av alle aktuelle norske spelarane frå svenske, tyske, finske og norske klubblag.

– Dessutan har smittesituasjonen ute i klubbane i Europa vorte verre samtidig som vi her heime har klart å halde smitten nede, seier Salsten.

Noreg skulle eigentleg ha spelt ei turnering i Riga i Latvia på denne landslagsdatoen, men ho er avlyst på grunn av koronapandemien.

(©NPK)

Landslagstrenar Petter Thoresen og Noreg har takka nei til å delta i ei turnering i Tyskland i november. Foto: Terje Pedersen / NTB

Annonse
Annonse