Norse Atlantic Airways får amerikansk flyløyve

Flyselskapet Norse Atlantic Airways har fått løyve av amerikanske transportstyresmakter til å starte flygingar mellom Europa og USA.

Selskapet planlegg å starte flygingar frå Oslo til USA i løpet av våren.

– Denne viktige milepælen fører oss eitt steg nærare lansering og vil bidra til fleire arbeidsplassar i luftfarten og reiselivsnæringa på begge sider av Atlanteren. Ikkje minst vil det bidra til verdiskaping som følgje av auka reiseaktivitet, seier konsernsjef og grunnleggjar Bjørn Tore Larsen i Norse i ei pressemelding.

I desember fekk Norse driftsløyve frå Luftfartstilsynet i Noreg og fekk det første flyet sitt av typen Boeing 787–9 Dreamliner.

Selskapet vart etablert i mars i fjor og vil konkurrere innan lågprissegmentet på langdistanseflygingar etter at Norwegian i fjor bestemde seg for å berre satse på Europa.

I tillegg til konsernsjef Larsen har dei mellom anna Norwegian-veteranane Bjørn Kjos og Bjørn Kise på eigarsida.

(©NPK)

Konsernsjef Bjørn Tore Larsen i det nyoppretta flyselskapet Norse Atlantic Airways fekk i desember i fjor levert det første av i alt 15 Boeing 787–9 Dreamliner. Foto: Håkon Mosvold Larsen / NTB

ANNONSE
Annonse
ANNONSE
Annonse
ANNONSE
Annonse