Norsk bedrift skal lage draktmerke til Premier League
Alle merke på Premier League-klubbanes fotballdrakter skal dei neste tre åra bli produsert av eit firma basert i Gaupne i Sogn og Fjordane.
Firmaet Avery Dennison NTP i Gaupne har allereie Barcelona, Red Bull og Lamborghini på kundelista, men frå neste sesong skal også namn og nummer på Premier League-draktene komme frå det norske firmaet, skriv NRK.
Kontrakten omfattar ikkje berre draktene som spelarane bruker, men også tal og bokstavar på dei såkalla replica-draktene som blir kjøpt av supporterar verda over. Berre Manchester United sel rundt to millionar drakter kvart einaste år.
Firmaet forventar å lage mellom 15 og 20 millionar merke kvart år.
- Det er den største fotballkontrakten det går an å få tak i, og vi har hatt auga på han i minst seks år, seier Tom Dyrdal, dagleg leiar i firmaet.
Dagleg leiar i Premier League, Richard Masters, seier at Avery Dennison NTP fekk kontrakten mellom anna fordi dei satsar på ein meir berekraftig produksjon enn konkurrentane.
(©NPK)
Frå neste år skal tal og bokstavar på Premier League-draktene produserast av eit norsk firma. På bildet viser Manchester Citys Bernardo Silva, Phil Foden og Leroy Sane fram sine draktmerke. Foto: AP Photo / Rui Vieira / NTB scanpix.
