Stoltenberg: - Noreg bør gjere meir
Noreg heng etter i innsatsen for å nå målet om å bruke minst 2 prosent av BNP på forsvar, åtvarar NATOs generalsekretær Jens Stoltenberg.
- Alle som heng etter, bør gjere meir. Det gjeld Noreg, og det gjeld alle andre land som heng etter, seier Stoltenberg til norsk presse i Brussel.
Han presenterte tysdag nye tal som viser at Noreg no ligg an til å bruke ein sum tilsvarande 1,70 prosent av bruttonasjonalproduktet (BNP) på forsvar i 2019.
Noreg kjem dermed endå eit skritt nærare NATO-målet, som er at alle allierte skal bruke minst 2,0 prosent av bruttonasjonalproduktet på forsvar.
Den norske BNP-prosenten har auka jamt frå 1,5 i 2015. I fjor var han 1,66 prosent.
- Det er bra at Noreg aukar. Det er ein auke i Noreg som vi helser velkommen, og som eg er glad for. Men auken er mindre enn hos dei fleste andre NATO-land. Dei fleste andre aukar meir enn Noreg, seier Stoltenberg.
Tolv NATO-land bruker i dag ein større del av BNP på forsvar enn Noreg.
Sju av landa har nådd 2 prosent allereie, og i alt 16 allierte når venteleg 2 prosent innan 2024. Noreg er ikkje blant desse landa.
(©NPK)
Forsvarsminister Frank Bakke-Jensen (H) kan skryte av auka forsvarsbudsjett i Noreg. Foto: Terje Pedersen / NTB scanpix
