Norsk Toppfotball vil utsetje avrøystinga om VM-boikott
Norsk Toppfotball ber om at det blir kalla inn til eit ekstra forbundsting som seinare i år kan ta stilling til spørsmålet om norsk boikott av VM i Qatar.
Etter at Tromsø gjekk ut med krav om at norsk fotball må boikotte Qatar-VM på grunn av arbeidsforholda til framandarbeidarane som gjer VM-draumen mogleg, har fleire klubbar støtta opp om boikottkravet.
Norsk Toppfotball hadde fredag eit møte med Norges Fotballforbund og toppklubbane. Der tok paraplyorganisasjonen til orde for å kalle inn til eit ekstra forbundsting seinare i år. Dermed kan NFF sleppe å måtte ta stilling til boikottspørsmålet på forbundstinget neste helg.
– Vi meiner at denne problemstillinga er for viktig til å risikere at det skal komme eit benkeforslag på forbundstinget om ei veke, som endar med at vi vedtek ein boikott av Qatar-VM. Ikkje fordi vi nødvendigvis meiner at boikott er feil verkemiddel, men fordi grunnlaget akkurat no er for dårleg, seier leiar i Norsk Toppfotball Cato Haug til VG.
Fotballpresident Terje Svendsen seier at NFF er positive til å halde eit ekstraordinært forbundsting for å avgjere saka.
(©NPK)
Det norske landslaget er enno ikkje kvalifisert til VM i Qatar, men dersom fleire norske klubbar får vilja si, er det uaktuelt å delta der same korleis det går i kvalifiseringa. Foto: Stian Lysberg Solum / NTB