Novavax seier covid-vaksine er over 90 prosent effektiv
Den amerikanske vaksineprodusenten Novavax seier vaksinen deira mot covid-19 er over 90 prosent effektiv og også vernar mot andre virusvariantar.
– Sprøyta har vist seg 100 prosent effektiv mot moderat og alvorleg sjukdom og 90,4 prosent effektiv totalt sett, opplyser selskapet etter omfattande testing i Nord-Amerika.
– 29.960 personar deltok på 119 stader i USA og Mexico for å vurdere effekten og tryggleiken, opplyser Novavax.
Effektiviteten var omtrent lik mot fleire variantar av viruset, inkludert alfavarianten, som først vart oppdaga i Storbritannia og no er den vanlegaste i USA. Han var òg effektiv i høgrisikogrupper som eldre og personar med underliggjande sjukdommar.
Biverknadene var for det meste milde, som ømheit og smerte ved stikkstaden. Det er ikkje meldt om uvanlege blodproppar eller hjarteproblem, seier konsernsjef Stanley Erck.
Etterspurnaden etter vaksinar har falle dramatisk i Novavax sin heimemarknad USA, men behovet er framleis stort andre stader i verda.
Novavax-vaksinen blir anteken å bli ei viktig brikke i vaksineinnsatsen i fattige land, fordi han er lett å lagre og transportere. Det vil likevel ta fleire månader før han kan takast i bruk.
Selskapet seier det vil søkje om godkjenning i USA, Europa og fleire andre stader innan utgangen av september. Etter det er målet å kunne produsere 100 millionar dosar i månaden.
(©NPK)
Novavax seier vaksinen deira er over 90 prosent effektiv mot covid-19. Illustrasjonsfoto: Alastair Grant / AP / NTB
