Nordre

Nye demonstrasjonar i Haiti mot presidenten i landet

Hundrevis av demonstrantar i Port-au-Prince i Haiti viste søndag avsky mot president Jovenel Moïse for fjerde dag på rad.

- Dette markerer den fjerde dagen med protestar mot presidenten, men han er framleis taus. Det beviser at han er inkompetent, seier demonstranten Louis-Paul Vlanel, mens ein barrikade av bildekk vart tent på i nærleiken.

Både FN og ambassadørar frå Frankrike, Tyskland, Brasil, Canada og USA har bedt haitiske politikarar innleie samtalar, men polariseringa i landet ser ut til å auke med den aukande valden.

Laurdag vart ein 14 år gammal gut og ein annan yngre mann skotne og drepne under ein spontan demonstrasjon i hovudstaden. Torsdag vart to andre drepne etter at opposisjonen mobiliserte til protestar. Fleire haitiske ordførarar har avlyst festarrangement i oppkøyringa til Haitis tradisjonsrike årlege karneval.

Misnøya med Moïse byrja å vise seg for alvor då han lét vere å etterforske korrupsjonsskuldingar mot den førre regjeringa knytt til Petrocaribe, eit subsidiert oljesamarbeid med Venezuela.

(©NPK)

Bilar og bildekk brenn i Haitis hovudstad. Misnøya mot president Jovenel Moïse aukar for kvar dag. Foto: Dieu Nalio Chery / AP / NTB scanpix

ANNONSE
Annonse
ANNONSE
Annonse