Nordre

Nye handelssamtalar mellom USA og Kina i Beijing

Amerikanske delegatar var måndag på plass i Beijing for innleiande handelssamtalar mellom USA og Kina.

USAs visehandelsrepresentant Jeffrey Gerrish skal leie den amerikanske gruppa i førebuande møte måndag, ifølgje Det kvite hus.

Finansminister Steven Mnuchin og handelsrepresentant Robert Lighthizer vil truleg først delta i hovudsamtalane, som finn stad torsdag og fredag. Også David Malpass, som president Trump har nominert som ny sjef for Verdsbanken, skal delta i desse samtalane. Han har mellom anna stått fram som ein kritikar av utlånet institusjonen har til Kina.

Den kinesiske delegasjonen blir leidd av visestatsminister Liu He. Også Yi Gang, Kinas sentralbanksjef, deltek.

Verken USA eller Kina har offisielt bekrefta at samtalane er i gang.

Viss ingen avtale er på plass innan 1. mars, vil USA auke tollavgiftene frå 10 til 25 prosent på kinesiske varer. Verdsbanken varsla i januar ein svakare vekst enn tidlegare anteke i verdsøkonomien både i år og neste år. Søndag åtvara dei om ein mogleg «økonomisk storm» som følgje av dette. Handelskonflikten mellom USA og Kina får delar av skulda.

USAs president Trump og Kinas Xi Jinping vart i desember einige om ei tre månader lang «våpenkvile» i handelskrigen der USA og Kina har pålagt kvarandre nye tollavgifter. Partane har dei siste månadene møttest fleire gonger.

Trumps økonomiske rådgivar Larry Kudlow sa førre veke at Trump er optimistisk med omsyn til ein ny avtale, men at det framleis er stor avstand mellom partane.

(©NPK)

USAs visehandelsrepresentant Jeffrey Gerrish og andre amerikanske delegatar i Beijing måndag. Dei skal delta i nye handelssamtalar mellom USA og Kina. Foto: AP / Andy Wong / NTB scanpix

ANNONSE
Annonse
ANNONSE
Annonse