Nye samtalar i Nord-Irland
Statsminister Theresa May i Storbritannia og statsminister Leo Varadkar i Irland tar initiativ til ein ny politisk prosess for å skape ro i Nord-Irland.
«Vi er blitt samde om å etablere ein ny prosess med politiske samtaler mellom alle dei viktigaste politiske partia i Nord-Irland og regjeringane i Storbritannia og Irland», skriv dei to statsministrane i ei felles fråsegn.
Målet er å få dei demokratiske institusjonane i Nord-Irland på beina igjen etter ein periode med aukande uro. Nord-Irland har vore under direkte styre frå London sidan 2017 fordi partia i provinsforsamlinga ikkje har klart å samarbeide om ei sjølvstyreregjering.
Dei nye samtalane skal starte så raskt som mogleg etter lokalvalet i Nord-Irland. Det går av stabelen torsdag neste veke.
Initiativet kjem etter dei kraftige samanstøytane mellom politi og demonstrantar i Derry i Nord-Irland skjærtorsdag der den 29 år gamle journalisten Lyra McKee vart skoten og drepen.
May og Varakar var begge til stades under gravferdsseremonien onsdag saman med ei rekke andre politiske leiarar.
Nye IRA, ein utbrytargruppe frå Den irske republikanske hær (IRA), har tatt på seg ansvar og beklaga «på det djupaste» at journalisten vart drepen. Nordirsk politi har arrestert ein 57 år gammal kvinne i samband med drapet.
(©NPK)
Irlands statsminister Leo Varadkar og Storbritannias statsminister Theresa May var begge til stades i gravferda til journalisten Lyra McKee onsdag. Foto: AP / NTB scanpix
