Nytt politihelikopter på veg til Noreg
Det tredje av dei nye helikoptera til politiet kan lande på Gardermoen fredag. Helikopteret er no i Danmark, men flyg vidare til Noreg viss vêret tillèt det.
Helikopteret starta ferda frå fabrikken i Italia onsdag. Etter ei landing i Tyskland er det no i Danmark, der besetninga ventar på betre vêr, slik at dei kan flyge vidare, skriv Politiforum.
Dei tre nye helikoptera er av typen AW169, og er produsert av det italienske selskapet Leonardo. Dei to første vart leverte i juni i år.
Den nye helikoptertypen er ei kraftig oppgradering frå dei noverande, og skal mellom anna kunne frakte seks personar frå beredskapsstroppen - med utstyr - over store avstandar ved behov. Det har ei utrekna rekkevidde på 250 nautiske mil.
(©NPK)
Justisminister Jøran Kallmyr (Frp) på Gardermoen i juni då dei to første nye politihelikoptera vart leverte. No er det tredje på veg og landar i Noreg fredag, dersom vêret tillèt det.
Foto: Vidar Ruud / NTB scanpix
