Ødegaard trenar heime: – Martin er frisk og ved godt mot
Real Sociedad-proffen Martin Ødegaard er ikkje sjuk og trenar heime i San Sebastián. Spania blir ramma brutalt av koronaviruset.
Torsdag skulle Ødegaard ha spelt EM-omspel for Noreg mot Serbia i Oslo. I staden sat han heime i leilegheita i Nord-Spania.
Det gjer han framleis. – Martin er frisk og ved godt mot. Han tek situasjonen på alvor og gjer det han får beskjed om å gjere frå klubben. Det vil seie at han held seg heime og berre dreg ut om han må. Trene gjer han òg berre heime hos seg sjølv, seier Ødegaards agent Bjørn Tore Kvarme til NTB.
Spania er svært hardt angripe av koronaviruset. Sjukehus i fleire byar melder om at kapasiteten er heilt sprengt.
Fredag ettermiddag hadde 4885 spanjolar mista livet etter å ha vorte smitta av viruset ifølgje worldometers.info. Mange av desse hadde underliggjande sjukdommar.
Det er meldt om vel 60.000 koronasmitta i Spania.
Pause?
I området av Spania der Ødegaard bur, er det òg mange som er ramma.
Fotballen i Spania står heilt på vent. Det er høgst usikkert når og om han kjem i gang igjen før sommaren.
Ligaen kan i ytste konsekvens komme til å bli avlyst. Ødegaards klubb Real Sociedad er med i kampen om ein plass blant dei fire beste i serien. Det vil i så fall gi Champions League-spel til hausten. I tillegg er Real Sociedad klar for den spanske cupfinalen. Det er uklart når den kampen kan spelast.
Noregs EM-omspel kan tidlegast spelast i starten av juni.
(©NPK)
Martin Ødegaard (til høgre) og Sergio Ramos må begge vente på fotballspel til koronavirus-pandemien er på retur. Foto: Heiko Junge / NTB scanpix
