Økokrim vil inndra 72 millionar kroner frå russisk rikmann

Den russiske advokaten Anatoli Bernstein har 72 millionar kroner på konto i Noreg. Økokrim meiner dette stammar frå straffbare handlingar og vil inndra pengane.

– Den russiske eigaren av pengane er sikta for heleri, seier statsadvokat Joakim Ziesler Berge i Økokrim til VG.

Pengane vart beslaglagde i 2014, og sidan då har Økokrim jobba med å få greie på opphavet til pengane gjennom ei omfattande internasjonal etterforsking, opplyser dei i ei pressemelding.

Advokattenester

Bernstein nektar for at han har gjort noko ulovleg. Pengane er mellom anna lønn for advokattenester for logistikk- og transportgruppa ULS, som har russiske og tyrkiske eigarar. I 2018 vart leiaren for ULS Global dømt til fengsel for smugling. Bernstein har vore advokat for nokre av aktørane i gruppa, og Økokrim meiner pengane stammar frå kriminelle handlingar.

– Pengane er opptente frå advokattenester. Dette er store summar, men kundane mine er velståande menneske, og dei betaler anstendig for jobben eg gjer, seier Bernstein.

– Pensjonssparing

Han seier at han rekna pengane som pensjonssparing og til å hjelpe hans nære som bur i Noreg.

Bernstein hevdar også at norsk politi ikkje har gjort reelle forsøk på å kontakte han direkte. Det har vore gjort kjent for Bernsteins tidlegare forsvarar at han var ønskt til avhøyr i Noreg, utan at det har skjedd, opplyser Økokrim.

Saka er ikkje relatert til sanksjonane som er innførte etter det russiske angrepet på Ukraina tidlegare i år, påpeikar Økokrim.

Norsk politi har etterforska saka sidan 2014. Saka skal opp i Vestfold tingrett i haust.

(©NPK)

ANNONSE
Annonse
ANNONSE
Annonse