Opprydding i gang etter syklonen Amphan
I India og Bangladesh prøver styresmaktene å få oversikt over øydeleggingane etter syklonen Amphan. Minst hundre menneske mista livet.
Mannskapa til indiske styresmakter jobbar med å rydde vegar og rette opp igjen kommunikasjonslinjer i delstaten West Bengal.
Statsminister Narendra Modi har for første gong under koronakrisa forlate hovudstaden New Delhi for å besøkje dei ramma områda fredag.
Medan minst 80 menneske omkom i India, døydde over 20 menneske i nabolandet Bangladesh.
Talet på døde i Bangladesh er høvesvis lågt, teke i betraktning at Amphan er det kraftigaste uvêret som har ramma regionen på over 20 år. Betre vêrvarsel og rutinar for krisehandtering bidrog til å avgrense skadane.
(©NPK)
Ein buddhistmunk på veg gjennom ei gate med nedblåste tre og greiner i storbyen Kolkata etter syklonen Amphan. Foto: Bikas Das / AP / NTB scanpix
Frivillige mannskap frå Indias Røde Kors hadde på seg smitteverndrakter då dei hjelpte til med å reparere denne bustaden i distriktet Bhadrak i den indiske delstaten Orissa torsdag. I India blei både Orissa og West Bengal ramma av syklonen Amphan. Foto: Røde Kors / AP / NTB scanpix
