Nordre

Ørjan Håskjold Nyland får Genk-spiss som lagkamerat

Aston Villa har sikra seg Mbwana Samatta frå belgiske Genk. Spissen blir med det lagkamerat med Ørjan Håskjold Nyland i Premier League-klubben.

27-åringen frå Tanzania har scora ti mål for Genk denne sesongen. Mellom anna scora han i 1-2-tapet borte mot Liverpool i meisterligaen i november.

– Eg er veldig nøgd med å få Mbwana til klubben. Han har scora mål gjennom heile karrieren, og eg gler meg til å jobbe med han, seier Aston Villa-manager Dean Smith til nettstaden til klubben.

Samatta har signert ein 4,5-årskontrakt med Premier League-klubben. 27-åringen scora 75 mål på 191 kampar for Genk, som har Sander Berge og Kristian Thorstvedt i troppen.

Aston Villa har mangla ein ordentleg spiss etter at Wesley pådrog seg ein alvorleg kneskade mot Burnley 1. januar. Birmingham-laget ligg eitt poeng under streken før det viktige botnoppgjeret mot Watford tysdag.

Ørjan Håskjold Nyland har spelt tre Premier League-kampar for Villa denne sesongen, men har fått auka konkurranse om keeperplassen etter at Pepe Reina nyleg vart henta på lån.

(©NPK)

Mbwana Samatta (nummer 10) er klar for Aston Villa. Her i aksjon for Genk borte mot Sarpsborg 08 i oktober 2018. Foto: Fredrik Hagen / NTB scanpix

ANNONSE
Annonse